2 min read

“Тогтвортой хөгжилд залуус” хөтөлбөр эхэллээ

“Тогтвортой хөгжилд залуус” хөтөлбөр эхэллээ

“Тогтвортой хөгжилд залуус” хөтөлбөр нь КОВИД-19 цар тахлын хариу арга хэмжээнд хувь нэмрээ оруулж, нийгэмд эерэг өөрчлөлтийг бий болгох залуучуудын идэвх, санаачилгыг дэмжих зорилго бүхий бичил төслийн хүрээнд  НҮБ-ын дэргэдэх Залуучуудын Зөвлөх Хороо,  ЮНЕСКО-ийн Монголын үндэсний комисс болон ЮНЕСКО-ийн Бээжин дэх төлөөлөгчийн газрын дэмжлэгтэйгээр 3 сарын хугацаатай зохион байгуулагдаж байна.

  Тус хөтөлбөр нь 16-24 насны залууст “Тогтвортой хөгжлийн зорилгууд”-ын талаар мэдлэг мэдээлэл хүргэх, үүнд бодитой хувь нэмрээ оруулах боломж олгох, утга учиртай сайн дурын ажлыг дэмжих чиглэлээр хэрэгжиж буй билээ. Хөтөлбөр 2021 оны 10-р сарын 30-нд албан ёсоор эхэлж, эхний сарын үйл ажиллаагаагаа Хэвлэлийн Хүрээлэнтэй хамтран хэвлэл мэдээллийн салбар ба түүний эргэн тойрон дахь ойлголтын хүрээнд сургалт явуулж өрнүүлэв. Ийнхүү хэвлэл мэдээллийн хэрэгслүүдэд шүүлтүүртэй хандах хандлагыг залуусын дунд нэмэгдүүлэх зорилгоор 2021 оны 11-р сарын 27,28-нд оролцогчдын дунд “ Хэвлэл мэдээллийн боловсрол”-ын хакатоныг амжилттай зохион байгуулж дуусгалаа.

  Оролцогчид 5 багт хуваагдаж, хуурамч мэдээллээс зайлсхийх, улмаар олон нийтэд хэрхэн зөв зохистой мэдээлэл хүргэж болох шийдлүүдийг хоёр өдрийн турш хэлэлцэн танилцуулсан юм. Үүнээс “Ногоон” багийн тикток, фэйсбүүк платформууд болон комик номоор дамжуулж бага насныханд хэвлэл мэдээллийн суурь боловсрол олгох төсөл шалгарч, 500.000 төгрөгөөр урамшуулав. Хакатоны шүүгчдийн бүрэлдэхүүнд Анрид медиа-ийн үүсгэн байгуулагчдын нэг, ерөнхий редактор Д.Ганзориг, UB Life сайтын тоймч, орчуулагч П.Номинбилэг, Монголын радиогийн сэтгүүлч Э.Ганхуяг болон хүний эрхийг хамгаалагч Б.Болорсайхан нар байлаа.